សេះពាន់យោជន៍ ចុងក្រោយនឹងក្លាយជាសេះអត់បានការយ៉ាងម៉េច?

មានសេះពាន់យោជន៍វ័យក្មេង១ក្បាល កំពុងរង់ចាំ "ប៉ឡឹក"មកឃើញ។ (លោក ប៉ឡឹក គឺជាអ្នកជំនាញខាងមើលសេះ អាចដឹងថាសេះមួយណារត់បានចំងាយ ពាន់យោជន៍ក្នុងមួយថ្ងៃ)
មានថ្ងៃមួយ ឱកាសបានមកដល់...
អ្នកជំនួញបាននិយាយថា៖ តើអ្នកព្រមទៅជាមួយខ្ញុំទេ។
សេះពាន់យោជន៍ក្រវីក្បាលនិយាយថា៖ ខ្ញុំសេះពាន់យោជន៍ តើឲ្យទៅបំរើអ្នកជំនួញដឹកទំនិញយ៉ាងម៉ិចកើត???

កូនទាហានមកដល់ ៖ តើអ្នកព្រមទៅជាមួយខ្ញុំទេ?
សេះពាន់យោជន៍៖ ខ្ញុំជាសេះពាន់យោជន៍ ឲ្យទៅបំរើកូនទាហានធម្មតាចឹងវាមិនសមនឹងតម្លៃខ្ញុំទេ!!!

អ្នកប្រម៉ាញ់មកដល់៖ តើអ្នកព្រមទៅជាមួយខ្ញុំទេ???
សេះពាន់យោជន៍៖ ខ្ញុំជាសេះពាន់យោជន៍ មិនអាចទៅរងទុក្ខក្នុងព្រៃជាមួយអ្នកបានទេ!
មួយថ្ងៃៗ មួយឆ្នាំៗបានកន្លងផុតទៅ...សេះមួយក្បាលនេះនៅតែមិនអាចរកឱកាសសាកសមសំរាប់ខ្លួនឯងបានទៀត។
មានថ្ងៃមួយ មានមន្រ្តីបេសកជនបានទទួលរាជបញ្ជាមកស្វែងរកសេះពាន់យោជន៍
ពេលបានជួបមន្រ្តីនោះ សេះពាន់យោជន៍ខំពោលថា៖
ខ្ញុំជាសេះពាន់យោជន៍ដែលលោកកំពុងស្វែងរក!!!!
ក៖ អ្នកឯងស្គាល់ផ្លូវក្នុងប្រទេសទាំងមូលទេ?
ខ:ក្រវីក្បាល
ក៖ អ្នកឯងធ្លាប់ចូលសមរភូមិទេ? មានបទពិសោធន៍ក្នុងសមរភូមិប៉ុន្មានឆ្នាំ?
ខ:ក្រវីក្បាល
ក៖ អ៊ីចឹងខ្ញុំប្រើអ្នកឯងបានប្រយោជន៍អី???
ខ៖ ខ្ញុំជាសេះពាន់យោជន៍ ថ្ងៃរត់បានពាន់យោជន៍ យប់រត់បាន800យោជន៍!!!
ក៖ អ៊ីចឹងអ្នកឯងរត់ឲ្យខ្ញុំមើលបន្តិចមក???
ចុងក្រោយ ...រត់មិនបានប៉ុន្មានផងក៏ហត់ដង្ហក់ស្ទើស្លាប់។
ក៖ អ្នកឯងចាស់ហើយ ប្រើការលែងកើតហើយ។និយាយរួចក៏បែខ្នងដើរចេញទៅបាត់។

[គ្រប់ឱកាសនិមួយៗ សុទ្ធតែមានប្រយោជន៍សំរាប់ថ្ងៃអនាគតរបស់យើងទាំងអស់។ អ្នកខំធ្វើ រឿងធម្មតាមួយៗរាល់ថ្ងៃ សុទ្ធតែជាបទពិសោធន៍ ដើម្បីពង្រឹងសម្ថភាពរបស់អ្នកនាពេលអនាគត។ ថ្ងៃនេះអ្នកជួបនិងរឿងបរាជ័យ មិនសប្បាយចិត្ត ត្រូវគេបដិសេធ វាប្រសើរជាងការមិនបានសាកល្បងធ្វើអ្វីសោះ ដល់ពេលខ្លួនចាស់គ្មានកំលាងនឹងធ្វើទៀត ទោះស្តាយក្រោយក៏វាហួសពេលដែរ។]

ដកស្រង់ពីអត្ថបទចិន
បកប្រែដោយ សុខ គឹមទៀវ